Íslendskt konsulát í Grønlandi

Ísland hevur latið upp konsulát í grønlendska høvuðsstaðnum Nuuk.

Fyrsti íslendski aðalkonsulin í Grønlandi verður Pétur Ásgeirsson, sum hevur starvast í uttanríkisráðnum í Reykjavík.

Aleqa Hammond, landsstýrisforkvinna í Grønlandi, sigur, at tað at íslendingar lata upp konsulát í Grønlandi, visir, at Ísland raðfestir viðurskiftini við Grønland høgt. Tað ger Grønland eisini, sigur hon.

Aleqa Hammond vísir á, at Ísland og Grønland kunnu hava tætt samstarv á enn fleiri økjum.

Íslendska konsulátið fer at røkja áhugamálini hjá íslendingum í Grønlandi, og hevur eisini heimild at útflýggja teimum pass.