Virknisdepil í Sandoynni til viðgerðar

Fíggjarnevndin fer á fundi í dag at viðgera virknis- og umlættingardepilin í Sandoynni.

Ætlanin er, at virknis - og umlættingardepilin í Sandoynni skal verða eitt landsfevnandi tilboð, ið gevur øllum børnum og ungum í Føroyum við serligum avbjóðingum møguleika fyri at fáa umlætting í gerandisdegnum og vikuskiftunum.

Eisini skal depilin vera karmur um lokala virksemið hjá Stuðulsfólkaskipanini fyri børn í Sandoynni.

Fjøltáttað tilboð

Í lógaruppskotinum stendur, at talan verður ikki um eitt siðbundið tilboð, sum vit kenna tað í dag.

Men møguleiki verður fyri at broyta og tillaga virksemið eftir tørvinum á økinum og í landinum sum heild.

Í deplinum verða 8 kømur við egnum baðirúmi og felagshølum til ymisk virknistilboð, ið kunnu rúma áleið 15 persónum. Almannaverkið hevur upplýst, at tørvurin á umlættingartilboði í vikuskiftunum er til staðar, sjálvt um henda tænasta í dag í ávísan mun verður veitt á antin Frítíðarheiminum, Dáanum ella í Reiðrinum.

Kostar 12 mió. kr.

Umlættingarheimið er mett at kosta 12.400.000 krónur.

Í samtyktu løgukørmunum fyri ávikavist 2013, 2014 og 2015 eru hesir pengar settir av til heimið.

Uppskotið hevur verið leingi ávegis. Annika Olsen legði uppskotið fram í apríl í ár, men tá vrakaði samgongan tað, tí hon helt, at uppskotið var ikki nóg undirbygt.

1. viðgerð av nýggja uppskotinum um virknis- og umlættingardepil í Sandoynni var í tinginum 22 oktobur.

Ætlanin er, at depilin skal vera klárur at taka í nýtslu í 2016.

Fíggjarnevndin fer eisini at viðgerða fíggjarlógina, lóg um umkoyringarveg í Skálabotni rundan um bygdina, og fleiri fylgilógir.