Kommunur fáa gjald eftir útreiðslunum hjá landinum

Tað verða útreiðslurnar hjá landinum til eldraøkið, sum gera av, hvussu nógvar pengar, kommunurnar fáa úr landskassanum, tá tær taka við eldraøkinum tann 1.januar 2015.

Tað sæst í viðmerkingunum til lógaruppskotið, sum Annika Olsen, landsstýriskvinna, legði fyri løgtingið í síðstu viku.

Landið og kommunurnar hava ikki verið samd um, hvussu nógv eldraøkið kostar.

Kommunurnar siga, at tað kostar meira enn tað, sum landið hevur verið sinnað at lata.

Í viðmerkingunum til lógaruppskotið stendur, at fyri kommunurnar merkir uppskotið, at kommunurnar skulu bæði rinda fyri og hava ábyrgdina av eldraøkinum.

Og so stendur, at fíggingin verður fingin til vegar á tann hátt, at landið rindar kommununum eina ávísa upphædd hvørt ár, sum samsvarar við útreiðslurnar, sum landið hevur av økinum.

Fíggjarmálaráðið hevur gjørt uppskot um fíggjarleist.

Tað uppskotið er tó ikki komið á heimasíðuna hjá løgtinginum, hóast tað er fylgiskjal hjá lógaruppskotinum.