Atlantic Airways keypir partabrøv aftur

<p>Seinnapartin í dag fær partafelagið Atlantic Airways loyvi til at keypa partabrøvini, sum vórðu seld privatum íleggjarum, tá ein triðingur av felagnum varð einskildur í 2007.</p>

<p>Felagið hevur eykaaðalfund í Sørvági í dag. Nevndin í felagnum biður eykaaðalfundin um loyvi til at keypa partabrøvini fyri kursin 210. Eingin ivi er um, at felagið fær loyvið at keypa partabrøvini aftur.</p>

<p>Tí Johan Dahl, landsstýrismaður í vinnumálum, fer at atkvøða fyri uppskotinum. Tá landið eigur tveir triðingar av Atlantic Airways, er atkvøðan hjá landsstýrismanninum á eykaaðalfundinum, avgerandi.</p>

<p><strong>Fer at kosta Atlantic Airways 72 mió. kr.</strong></p>

<p>Løgtingið hevur tikið undir við, at føroyska flogfelagið verður 100 prosent alment aftur. Tað fer at kosta Atlantic Airways 72 mió. kr. at keypa partabrøvini, sum vórðu seld í 2007.</p>

<p>Tá, í 2007, var politiska ætlanin at selja ein triðing afturat av felagnum. Men tann ætlanin varð ongantíð framd, og nú er ikki undirtøka fyri henni í løgtinginum.</p>

<p>Tey, sum keyptu partabrøv í 2007, kenna seg snýtt, tí partabrøvini hava lítlan og ongan áhuga hjá teimum, sum selja og keypa partabrøv í keypsskálunum.</p>

<p><strong>Nevndarformaðurin ynskir frið kring Atlantic Airways</strong></p>

<p>Landið eigur meirilutan í felagnum og landsstýrið ræður tí einsamalt. Minnilutapartaeigarar halda seg hava gjørt eina vánaliga íløgu og hava harafturat onga ávirkan á felagið. Í februar varð so boðað frá, at nú skuldi Atlantic Airways aftur gerast alment burturav.</p>

<p>Tað er eingin loyna, at viðurskiftini viðvíkjandi privatiseringini - og óvissan, um einskiljingin heldur fram, hava elvt til ófrið rundan um felagið.</p>

<p>Slíkt kann ikki halda fram, og tí vil nevndin hava hesi viðurskifti í rættlag. Tað er eisini av alstórum týdningi, at friður valdar kring Atlantsflog, nú lagt verður til brots av nýggjum, segði Niels Mortensen, nevndarformaður, við útvarpið í februar.</p>