Bar við grótkast í Hesti - nú er kostnaðurin komin

<p>Lagt var ikki nóg mikið upp fyri vindi og ráki, tá Teistin skuldi inn í havnina í Hesti skírismorgun. Tað sigur Johan Dahl, landsstýrismaður, í svari til Páll á Reynatúgvu, løgtingsmann.</p>

<p>Kostnaðurin fyri umvælingina er fyri sjálvsábyrgd, sum er 500.000 kr., leiguskip og eftirlit. Strandferðslan hevur ikki biðið um sjófrágreiðing um óhappið hjá Teistanum.</p>

<p>Johan Dahl sigur, at innanhýsis frágreiðing er gjørd, og klassin, tryggingin og myndugleikarnir hava fingið avrit av henni. Sjóvinnustýrið hevur eisini fingið frágreiðingina.</p>

<p><strong>Harður streymur tá óhappið hendi</strong></p>

<p>Sambært svarinum hjá Johan Dahl var harður streymur hendan morgunin, Teistin skuldi inn í havnina í Hesti, og 18 m/s av útnyrðingi. Rák og vindur lógu í somu ætt. Veðrið var annars gott.</p>

<p>Í tílíkum umstøðum er neyðugt at leggja nógv upp fyri, fyri at mótvirka bæði vindi og ráki, tá farið verður inn um munnan í havnarlagnum í Hesti, tí hekkan á skipinum kann verða trýst, eftir at framskipið er farið úr rákinum á deyðavatn.</p>

<p>Í hesum førinum, skírismorgun, má tíverri sigast, at ikki varð lagt nóg mikið uppfyri, stendur í svarinum hjá Johan Dahl. Tað fer at taka átta vikur at umvæla Teistan.</p>