Teistin aftur í sigling í hesi vikuni

Asimutturin á Teistanum er við Norrønu, sum kom á Havnina í morgun, og ætlanin er, at Teistin skal aftur í sigling um Skopunarfjørð seinast í hesi vikuni. 

Tað var skírismorgun, at Teistin bar við land, tá hann skuldi inn í havnina í Hesti.

Onnur skip sigla

Síðani  hevur Teistin ligið, Ternan hevur siglt um skopunarfjørð, og Jósup og Silja Star hava røkt nólsoyarleiðina. Sam hevur tveir dagar um vikuna flutt farm úr Havn til Nólsoyar.

Nú er so líkt til, at Teistin aftur fer í sigling.

At byrja við ljóðaði, at Teistin ikki fór at sigla aftur fyrr enn hálvan juli. Men Strandferðslan gjørdi av at senda asimuttin á Teistanum til umvælingar. Fyrst fór hann til Danmarkar, men har fingu teir einki gjørt við hann, og tí var asimutturin sendur á verksmiðju í Finnlandi, har hann er umvældur.

Jóhan Petur Abrahamsen, inspektørur hjá Strandferðsluni, sigur, at avgerðin um at umvæla asimuttin var skjótasta loysnin. Skuldi Strandferðslan bíðað eftir einum nýggjum asimutti,  tók tað 10 mánaðir. So skjótt sum asimutturin er komin í land, verður farið undir at umvæla Teistan á skipasmiðjuni hjá MEST í Havn.

Fríggjakvøldið ella hvítusunnuaftan

Í morgin kemur eitt umboð fyri verksmiðjuna hjá Rolls Royce, sum skal standa fyri arbeiðinum.

Gongst sum ætlað, verður Teistin klárur at sigla aftur fríggjakvøldið ella hvítusunnuaftan, sigur Jóhan Petur Abrahamsen inspektørur hjá Strandferðsluni.