Russar svangir eftir føroyskum fiskavørum

Russiskir fiskakeyparar í hópatali eru á veg til Føroya, ella eru teir longu í Føroyum fyri at keypa laks og annan fisk, nú onnur lond, sum selja fisk, ikki sleppa at selja til Russlands.

Tað skrivar heimasíðan Undercurrent News.

Føroyskir fiskaseljarar siga við Undercurrent News, at telefonirnar hjá teimum fóru at gløða, so skjótt, sum tað frættist, at Russland boykottar ikki Føroyar. Og teir fáa eisini teldupostar í hópatali úr Russlandi. 

Vilja hava laks

Sambært Undercurrent News vilja russarar serliga hava laks úr Føroyum, og tað skilst, at russiskir innflytarar vilja hava allan tann laks, teir yvirhøvur kunnu fáa úr Føroyum. Og prísurin fer eisini upp, tí eftirspurningurin er størri enn útboðið.  

Harafturat skriva Undercurrent News, at Russland eisini vil keypa makrel og ikki minst sild úr Føroyum og Íslandi, nú Noreg er boykottað.