Obama ætlar at týna IS-felagsskapin

Amerikanski forsetin, Barack Obama, lovaði í sjónvarpsrøðu til amerikanska fólkið í nátt, at hann fer at týna felagsskapin Islamskur Statur, - stytt IS. 

Men ongar amerikanskar stríðsdeildir verða sendar í økið, hinvegin skal USA hjálpa lokalum deildum, sum stríðast móti IS, í luftálopum, hernaðarligari venjing og fíggjarliga.

Obama vísti á fýra stig í nýggju ætlanini at basa IS.

Í fyrsta lagi halda amerikonsku luftálopini í Irak fram, men hesi álop kunnu verða víðkað til eisini at fevna um grannalandið Sýria. 

Himprast ikki við at leypa á

- Eg himprist ikki við at leypa á IS í Sýrialandi og í Irak. Tað er eitt kjarnumál fyri meg sum forseti: At hóttir tú USA, kanst tú ongantíð finna trygga havn, segði Obama í røðuni.

Í øðrum lagi fer USA at økja um hjálpina til lokalu deildirnar, sum vilja niðurberja IS.

Triðja mál er at raka IS fíggjarliga, og at forða IS í at útvega sær nýggj uppreistrarfólk í millum annað vesturheiminum.

Og sum fjórða mál fer USA at hækka humanitera stuðulin til IS-offur og flóttafólk í økinum.

Obama hevur verið undir trýsti - serliga hava republikanskir politikarar kravt, at USA er hvassari í stríðnum at steðga menningini av IS, og eisini hava floksfelagar hjá Obama, - øvugt, stúrt fyri at tveita landið út aftur í nýtt kríggj, sum ongan endadato hevur.

- Megin hjá USA kann gera avgerandi mun, men vit kunnu ikki gera arbeiðið fyri irakar, segði Obama, og mælti til tolsemi.

- Hetta fer at taka tíð at taka burtur ein krabbameinsvull, sum IS.

IS hóttir USA

- Hóast vit enn ikki hava avdúkað ítøkiligar ætlanir um yvirgangsatsóknir móti USA, hava IS-leiðarar hótt USA og okkara sameindu. Fregnartænastan hjá okkum heldur, at túsudtals útlendingar, millum annað evropearar og nakrir amerikanarar, eru farnir í part við IS í Sýria og Irak. Hesir servandu krígsmenn kunnu venda aftur til heimlandið, og fremja deyðiligar yvirgangsatsóknir har, segði Obama.

Meiningakanningar í USA hava víst, at um 70 prosent av amerikanarum taka undir við, at USA fremur luftálop í Irak, og nakað minni stuðla loftálopum á IS í Sýrialandi. 

Samstundis vísa meiningakanningar undan ávegisvalinum í USA, at undirtøkan fyri Obama millum amerikanska fólkið er lítil.