Dart: Kasta um evropameistaraheitini í Føroyum í 2026

EM í darti verður í Føroyum í 2026.

Tað hava evropeisku londini í World Darts Dederation gjørt av í atkvøðugreiðslu sunnudagin, skrivar Dartsamband Føroya.

Roknast kann við, at umleið 300 spælarar úr á leið 40 londum fara at kasta um evropameistaraheitini í stóru altjóða kappingini, sum verður við Tjarnir.

EM í darti er fyri landslið, og liðini eru mannað av fýra monnum og fýra kvinnum, sum spæla dystir í fýra dagar. Liðini kappast í trimum greinum hjá hvørjum kyni: einmansleiki, tvímansleiki og liðkapping.

Høvi verður hjá øllum dartáhugaðum føroyingum at síggja dart á hægsta stigi, tá finaludagurin verður skipaður sum eitt stórt alment tiltak.

WDF Europe Cup, sum er almenna heitið á kappingini, verður í Føroyum í døgunum 29. september til 3. oktober 2026.