Hámarkið í barsilsstuðlinum verður nú prístalsjavnað hvørt ár

Margit Stórá, landsstýriskvinna í arbeiðsmarknaðarmálum, bar fleiri broytingar í barsilslógini í løgtingið í gjár. 

Hámarkið í barsilsstuðlinum verður nú prístalsjavnað hvørt ár.

Broytingin skal tryggja, at størsta útgjald úr barsilsskipanini samsvarar við prís- og lønarvøksturin.

Betri umstøður at ættleiða

Foreldur, sum ættleiða barn, fáa rætt til barsilsfarloyvi samstundis í fýra vikur afturat teimum fýra vikunum sambært galdandi lóggávu. 

Tey fáa tí rætt til barsilsfarloyvi samstundis í átta vikur.

Ein broyting gevur faðiri ella sammóður rætt til 28 vikur, tá tvey ella fleiri børn eru í sama barnsburði.

Foreldur, sum ættleiða tvey ella fleiri børn í senn, fáa rætt til barsilsfarloyvi í 28 vikur samstundis. 

Støk kunnu lata umsogarnarfólk barsilsfarloyvi

Støk foreldur,  sum fáa tvey ella fleiri børn, kunnu lata einum umsorganarfólki 28 vikur í barsilsfarloyvi, sum kunnu nýtast meðan foreldrið er í barsilsfarloyvi.

Og, tá móðir ella barn vera innløgd innan fyri 52 vikur eftir barnsburð, fáa foreldrini møguleika at leingja barsilsfarloyvið við tí tíðarskeiði, barnið er innlagt. 

Haraftat fáa tey, sum fáa barn fyribils staðsett, rætt til barsilsfarloyvi eftir somu treytum, sum foreldur, sum ættleiða.

Broytingarnar í barsilslógini skulu koma í gildi 1. mai næsta ár.