Nýggjasta kanningin: Stjórnarskifti í Svøríki

Er nýggjasta veljarakanningin upp undir ríkisdagsvalið í Svøríki í morgin eftirfarandi, verður stjórnarskifti.

Sambært kanningini, sum Dagens Nyheter hevur latið gera, og sum var kunngjørd undir seinasta floksleiðaraorðaskiftinum í svenskum sjónvarpi í gjárkvøldið, fáa reyð-grønu flokkarnir 46,4 prosent av atkvøðunum og borgarliga samgongan hjá Fredrik Reinfeldt, forsætisráðharra, 39,6 prosent.

Flokkurin Svensku demokratarnir, sum eingin av hinum flokkunum vil samstarva við, fær sambært kanningini 9,4 prosent. 

Gongdin vend

Seinastu dagarnar hava veljarakanningar annars víst, at munurin millum stjórnarflokkarnar og andstøðuna er nógv minkaður, men sambært kanningini, sum varð kunngjørd í gjárkvøldið, er gongdin vend.

Og er hon eftirfarandi, verður formaðurin í sosialdemokratiska flokkinum, Stefan Løfven, nýggjur forsætisráðharri í Svøríki eftir valið.

Fredrik Reinfeldt úr konservativa flokkinum hevur verið stjórnarleiðari í Svøríki seinastu átta árini.