Hámarkið fyri inngjald í ALS upp í 650.000 krónur

Johan Dahl, landsstýrismaður, hevur skotið upp at hækka hámarkið fyri inngjald upp í 650.000 krónur. Tað var eisini markið, áðrenn lógarbroytingar vórðu gjørdar í 2012. Broytingin verður mett at geva 2,2 milliónir kr.

Reglan um bíðidagar verður nú tengd at inntøku. Eftir galdandi skipan fáa øll 10 bíðidagar, men nú verða teir lækkaðir niður í tveir fyri inntøkur upp til 250.000 kr. Bíðidagarnir hækka síðani tveir dagar fyri hvørjar 100.000 kr., sum útrokningargrundarlagið hækkar, tó í mesta lagi upp í 10 dagar. Bert tey, sum hava eitt inntøkugrundarlag, ið er oman fyri 550.000 kr., fáa 10 bíðidagar.

Persónar, sum  mynstra við skipum í styttri enn ein mánað, fáa ikki bíðidagar eftir nýggju reglunum, og tað fer væntandi at gera tað lættari hjá skipum at fáa manning, stendur í viðmerkingunum til uppskotið.

Eftir galdandi reglum fáa tey, sum siga seg úr starvi uttan haldgóða grund, ella burturvíst orsakað av tænastubroti, karantenui fýra vikur. Nú verður karantenan átta vikur. Metta sparingin er 3,2 milliónir kr.

Sum er ber til at fáa arbeiðsloysisstuðul í 648 dagar í einum trý ára skeiði. Nú verður skotið upp, at tíðarskeiðið, sum fólk kunnu koma upp á fult dagatal, verður longt úr trimum upp í fýra ár. Sparingin verður mett at verða millum 8 og hálva níggjundu millión kr. 

Hóast arbeiðsloysið er lítið, hevði ALS 28,5 milliónir kr. í halli í fjør, og verður einki gjørt, verður skipanin ikki haldfør í longdini, stendur í uppskotinum.

Nú er ætlanin, at ALS skal hava avlop, um arbeiðsloysið er minni enn 4,5 prosent, og tí er neyðugt at bøta raksturin 15-30 milliónir kr. um árið.

Fyrsta stigið skal útvega skipanini 14 mill. kr.