- Tíðindi, mentan og ítróttur
Arbeiðið at fyrireika Suðuroyartunnilin gongur eftir ætlan
Arbeiðið at fyrireika Suðuroyartunnilin gongur eftir ætlan
Ein boring gjøgnum Traðarhamar er í gongd, og Vikmar ger í løtuni ískoytiskanningar av havbotninum í Skúvoyarfirði og Suðuroyarfirði
Forprosjektini fyri vegir og tunlar á landi verða send Landsverki til góðkenningar í heyst.
11.09.2026 - 08:58
Eingin ætlan er um at broyta lógina um at fyrireika Suðuroyartunnilin. sum løgtingið samtykti 25. februar.
Og arbeiðið gongur eftir ætlan.
Ein boring gjøgnum Traðarhamar er í gongd. Og Vikmar ger í løtuni ískoytiskanningar av havbotninum í Skúvoyarfirði og Suðuroyarfirði.
Tað sigur Jacob Vestergaard, landsstýrismaður, í svari til Jenis av Rana, løgtingsmann.
Tá skrivað var undir semjuskjalið um Suðuroyartunnilin. Í miðjuni Jenis av Rana, sum nú hevur spurt landsstýrismannin, hvussu gongur at fyrireika tunnilin. (Mynd: Bjarni Árting Rubeksen)
Forprosjekt sent Landsverki
P/F Suðuroyartunnil hevur sent Landsverki umsókn um at góðkenna forprosjektið. Tað var 21. mai.
Landsverk arbeiðir støðugt við málinum saman við serkunnleika um at góðkenna forprosjektið.
Forprosjektini fyri vegir og tunlar á landi verða send Landsverki til góðkenningar í heyst.
Prosjekteringin er mett taka eitt ár, sigur landsstýrismaðurin.
Jacob Vestergaard, landsstýrismaður, sigur, at arbeiðið at fyrireika Suðuroyartunnilin gongur sum ætlað.
Kanna umhvørvisárin
Umhvørvisárinini vera kannað. Frágreiðingin um tey verður vónandi liðug um árskiftið og send Umhvørvisstovuni, sigur Jacob Vestergaard.
Írestandi jarðfrøðiligu kanningarnar eru í gongd.
Boringar á Skálafjalli í sambandi við Sandvíkarbergholið eru gjørdar, og boringar á Sandarfløttinum eru eisini gjørdar.
Er kopiera
Nýggjastu sendingar í ÚV
Nýggjastu sendingar í SV
