Samráðingarnar um svartkjaftin verða truplar

<p>ES hevur sagt avtaluna um býtið av svartkjafti upp. Tí verður helst neyðugt við fleiri samráðingarumførum. Jacob Vestergaard, landsstýrismaður, var fyrrapartin í Uttanlandsnevndini til ráðførslu um svartkjaftin. Hvat kom burturúr ráførsluni ber ikki til at fáa at vita.</p>

<p>Í 2014 var svartkjaftakvotan 1,2 milliónir tons. Av teimum tonsunum fekk ES 337.000 tons, Føroyar 288.000 tons, Ísland 195.000 tons og Noreg fekk 284.000 tons av svartkjaftakvotuni.</p>

<p><strong>ES vil hava størri part av kvotuni</strong></p>

<p>Sum skilst vil ES hava størri part av kvotuni, tí svartkjafturin heldur í stóran mun til í ES sjógvi, har fiskiskapurin eisini vanliga byrjar, og í føroyskum sjógvi. Fer ES at krevja størri part av kvotuni, so fara Føroyar uttan iva at gera tað sama.</p>

<p>Hendir hetta, mugu Ísland og Noreg góðtaka ein minni part av svartkjaftinum. Føroyar standa a odda fyri samráðingunum í svartkjaftin, og næsti samráðingarfundurin verður hálvan desember.</p>

<p>Virðið á svartkjaftinum er høgt í løtuni, tí fiskiskapurin eftir ansjósum í Peru hevur svikið, og tí hækkar prísurin á fiskamjøli og lýsi nógv. Finansial Times skrivaði í gjár, at prísurin fyri eitt tons av fiskamjøli er hækkaður upp í 2.500 dollarar, sum er met.</p>