Drykkjuvanar hjá ungum í Føroyum kannaðir

176 ung siga seg hava drukkið rúsdrekka í minsta lagi 10 ferðir í lívinum. 90 siga seg í minsta lagi tríggjar ferðir hava drukkið rúsdrekka seinastu 30 dagarnar, vísir stóra spurnakanningin, Ungfólk í Føroyum frá 2012, sum Firouz Gaini, granskari, hevur gjørt í 9. flokkum kring alt landið.

99 ung siga seg hava verið full í minst lagi 10 ferðir í lívinum. 34 ung hava verið full í minsta lagi tríggjar ferðir seinastu 30 dagarnar. Og ikki færri enn 107 ung hava verið full 1-2 ferðir seinastu 30 dagarnar.

Kanningin vísir eisini, at flestu eru í býnum ella í dansi, tá tey drekka. Partur av ungdóminum drekkur eisini, tá hann er í skúlaveitslu, og sera fá drekka heima við hús. 29 prosent av teimum ungu smakkaðu fyrstu ferð rúsdrekka, tá tey vóru 13 ár ella yngri.

Fjórði hvør drekkur ikki

Fjórði hvør av teimum ungu sigur seg als ikki drekka rúsdrekka. 123 ung høvdu longu roynt at vera full, tá tey vóru 13 ár ella yngri. Granskingarverkætlanin var eitt slóðbrótandi samstarv millum Rannsóknir & Greining á Háskúla Reykjavíkar og Námsvísindadeildina á Fróðskaparsetrinum.

Firouz Gaini, sum samskipaði og gjøgnumførdi tann føroyska partin, hevur eisini skrivað frágreiðingina Ungfólk í Føroyum 2012. 19 av tilsamans 21 skúlum við 9. flokkum luttóku. Kanningin umfatar øll, sum eru fødd í 1996.

Nakrir fáir luttakarar eru tó 1 ár yngri ella eldri. Svarprosentið var 76,1 prosent í Føroyum. Tað er eitt góðkent støði. Umleið 540 luttakarar vóru eftir, tá tey ógyldugu skjølini vóru drigin frá. Umleið 52 prosent vóru gentur.