Ferð komin á sethúsasøluna í Føroyum

<p>Tað gongur væl hjá húsameklarafyritøkum at selja sethús í Føroyum&nbsp;í løtuni. So mikið væl, at tann eina av teimum stóru meklarafyritøkunum í fjør setti met.</p>

<p>Húsameklarafyritøkan Skyn hevur ongantíð áður selt so nógv sethús, sum fyritøkan gjørdi í 2014. Tað vísir ein&nbsp;nýggj uppgerð hjá <a href="http://skyn.fo/Files/Billeder/Met%20%C3%A1r%20vi%C3%B0%20s%C3%B8lum%20ru... target="_blank">Skyn</a>, nú 2014 er gjørt upp.</p>

<p>Í 2014 setti Skyn met, tá fyritøkan hevði 174 húsasølur um hendi. Skyn seldi 42 prosent fleiri sethús í 2014 enn fyritøkan gjørdi árið frammanundan, í 2013</p>

<p><strong>Kappingarneytin letur eisini væl at</strong></p>

<p>Eisini hjá kappingarneytanum longur uppi í miðbýnum í Havn, hjá húsameklarafyritøkuni Inni, er ferð komin á sethúsasøluna, sigur stjórin.</p>

<p>- 2014 royndist&nbsp;betri hjá okkum enn 2013. Høvuðsorsøkin er lága sethúsarentan, ið ger&nbsp;at fólk lættari fáa húsalán, sigur stjórin, Kára á Dunga.</p>

<p>Tað er serliga í Havn, at báðar húsameklarafyritøkurnar selja nógv sethús. Nógv hús verða í løtuni eisini seld í Klaksvík, Eysturoy&nbsp;og Norðurstreymoy.</p>

<p><strong>Sethús dýrkaði 400.000 krónur</strong></p>

<p>Samstundis sum bæði Skyn og Inni boða frá, at tað gongur væl at selja sethús í Føroyum, serliga í høvuðsstaðarøkinum, fer prísurin eisini uppeftir.</p>

<p>- Eini sethús í Havn verða seld fyri 400.000 krónur meira nú í mun til fyri einum ári síðan, sigur Kára á Dunga, stjóri í húsameklarafyritøkuni, Inni.</p>

<p>Miðalprísurin fyri eini sethús í Havn var&nbsp;1.900.000 krónur fyri einum ári síðan. Nú er miðalprísurin farin uppá 2.300.000 krónur.</p>

<p><strong>Tvífalt so skjótt at selja sethús</strong></p>

<p>Fyri einum ári síðan stóðu sethús í Havn á sølulista í umleið eitt hálvt ár, áðrenn tey vórðu seld. Tann gongdin er eisini broytt hetta seinasta árið.</p>

<p>- Nú er tað tvífalt so skjótt hjá okkum at selja eini sethús. Miðaltíðin, hús standa til sølu, er nú umleið tríggjar mánaðir, sigur stjórin í Inni, Kára á Dunga.</p>

<p>Høvuðsorsøkin, til at sethús nú verða seld tvífalt so skjótt, er, at eftirspurningurin eftir sethúsum í Havn í løtuni er munandi størri enn útboðið er, og tá gongur skjótt at selja, sigur stjórin í Inni.</p>