Løgtingsnevndir úr at gera eftir páskafrítíðina

Fíggjarnevndin skal millum annað viðgera trý ríkislógartilmæli, sum skulu tryggja, at lóggávan undir føroyska bankakervinum samsvarar við lóggávuna í Danmark og í ES.

Basel III leiðreglurnar, sum ætlanin er at seta í verk í Føroyum, komu í kjalarvørrinum á fíggjarkreppuni. Tær hava til endamáls at styrkja um fíggjarfyritøkur, so tað almenna sleppur undan at bjarga teimum, tá fíggjarkreppur stinga seg upp, stendur í lógaruppskotinum.

Fyri at lóggávan á bankaøkinum í Føroyum, sum er danskt málsøki, skal vera á hædd við lóggávuna í Danmark, er neyðugt at seta í gildið ES-lóggávupakkan, í Føroyum, stendur í lógaruppskotinum, sum Jørgen Niclasen, landsstýrismaður í fígjarmálum, hevur lagt fram.

Mentanarnevndin 12 mál

Eisini í Mentanarnevndini eru nógv mál á skránni í morgin, tey eru 12 í tali. Nevndin skal millum annað viðgera tvey nýggj lógaruppskot, eitt um stuðul til privatar fjølmiðlar, og hitt er uppskot til løgtingslóg um upphavsrætt.

Løgtingið hevur samtykt at seta játtan av til miðlastuðul til privatar miðlar í 2015, men lógargrundarlag má fáast fyri at stuðulin kann latast.

Lógaruppskotið skal millum annað fevna um at stuðla útbreiðslu av fjølmiðlatilfari og at stuðla redaksjonellum arbeiði, stendur í lógaruppskotinum, stendur í uppskotinum.