Kyndil hevur fingið nýggjar venjarar

Bárður Johannesen og Julian Johansen verða høvuðsvenjarar hjá 1. mansliði hjá Kyndli næsta kappingarár, og Kristian Martin Joensen, fyrrverandi venjari í svimjing, triathlon og kappróðri, verður kropsligur servenjari hjá hópinum og hvørjum spælara sær.

Bárður Johannesen og Julian Johansen verða høvuðsvenjarar. Bárður var fyri trimum árum síðan í venjaratoyminum hjá kyndilsmonnum,og er í løtuni hjálparvenjari hjá kvinnuliga U17-landsliðnum. 

Julian Johansen hevur farnu árini spælt við besta mansliðnum og í næstan 10 ár vant ungdómslið hjá Kyndli. Eisini hevur hann vant ÍF Føroyar, besta kvinnuliðið hjá Neistanum og kvinnurnar hjá Kyndli.

Aftrat teimum báðum hevur Kyndil sett Kristian Martin Joensen sum kropsligan servenjara hjá mansliðnum. Kristian Martin hevur verið høvuðsvenjari hjá Havnar Svimjifelag, knýttur at svimjilandsliðnum, vant bróðirin, Gudmund Joensen, í triathlon og vant m.a. Argjabátin.

Nýggja venjaratoymið hevur á fundi avtalað, hvussu farið verður til verka, og málið er greitt: Kyndil skal í finalur næsta kappingarár, og so nógvir kyndilsmenn sum gjørligt skulu sum frálíður á a-landsliðið, sum ætlandi fer til verka aftur í næstum.

Kelda og mynd: kyndil.fo