Fólk nøgd við sjúklingahotellið

Fólk eru nøgd við tænastustøðið, skrivar Landssjúkrahúsið. Uttanlandsdeildin á Landssjúkrahúsinum skipar fyri ferð og uppihaldi hjá sjúklingum, ið skulu uttanlands í viðgerð.

Stórur partur av føroysku sjúklingunum, ið skulu viðgerast uttanlands, fara til Danmarkar í viðgerð, har teir fáa innivist á Sjúklingahotellinum Tórshavn.

119 fólk, sum hava búð á Sjúklingahotellinum ávíst tíðarskeið í ár, hava svarað spurnarblaði um praktiska kunning í samband við ferðina, og um mat, reingerð og sjúkrarøkt á sjúklingahotellinum.

Væl nøgd, men pláss er eisini fyri betringum

Yvirorðnaða úrslitið vísti høgt nøgdsemi við tænastuna, skrivar Landssjúkrahúsið. Tey, ið svaraðu, høvdu møguleika at koma við viðmerkingum til annað enn settu spurningar, og fleiri bóru fram viðmerkingar til betringar innan ávís øki.

Uttanlandstænastan og Sjúklingahotellið hava tikið viðmerkingarnar frá nøgdsemiskanningini til sín at arbeiða við.

Endamálið við kanningini er, at sjúklingurin skal fáa betri tænastu og at tænastan verður samskipað á besta hátt millum Uttanlandstænastuna, Sjúklingahotellið og viðgerðastaðið.