Drápsmálið í Hvalba dregur út

Hetta sigur politivaldið.

Undir grundlógaravhoyringini 10. august í fjør bað rætturin um eina mentalkanning av skuldsetta manninum, og hon er ikki liðug enn. Helst koma vit til hálvan mai, áðrenn mentalkanningin fyriliggur, og tá skal danska rættarlæknaráðið brúka eini 6-8 vikur at taka støðu til, um maðurin er egnaður at fáa fongsulsrevsing.

Mentalkanningin tikið drúgva tíð

Hetta merkir, at tað hevur tikið átta og ein hálvan mánað at fáa eina mentalkanning gjørda í psykiatrisku skipanini, og at maðurin, tá málið einaferð kemur fyri, kann hava sitið í varðhaldi í eitt heilt ár ella meira.

Maðurin er 23 ára gamal, og hann er skuldsettur fyri at hava dripið ein 36 ára gamla mann, sum var funnin deyður í Hvalba í august í fjør. 

Skuldsetti maðurin hevur hvørki játtað ella noktað seg sekan.