Jóhan á Plógv Hansen á danska A-landsliðnum

Landsliðsvenjarin hjá Danmark í hondbólti, Gudmundur Gudmundsson, kunngjørdi í dag bruttohópin til komandi EM-undankappingardystirnar.

Í hópinum er 21 ára gamli føroyingurin, Jóhan á Plógv Hansen, sum dagliga spælir fyri Skanderborg.

Fleiri í donskum hondbólti halda, at Jóhan er millum størstu talentini í Danmark, og landsliðsvenjarin er einki undantak

- Hann er ikki bara eitt talent, hann er eitt risastórt talent, og tað verður spennandi at síggja, hvat hann klárar á hægsta stigi, segði Gudmundur Gudmundsson á tíðindafundi í dag.

Danmark hevur tveir EM-undankappingardystir eftir. 10.juni verður spælt á útivølli móti Litava, og 14.juni er Danmark á heimavølli móti Bosnia/Hersigovina.