Aleqa Hammond aftur í politikki

<p>Leiðslan í grønlendska flokkinum Siumut hevur fyrigivið Alequ Hammond, fyrrverandi landsstýrisforkvinnu, sum noyddist úr politikki í fjør heyst, tí hon hevði brúkt pengar úr landskassanum til egnar rokningar.</p>

<p>Nú er Aleqa Hammond aftur í politikkinum. Flokkur hennara hevur stillað hana upp til fólkatingsvalið 18.juni.</p>

<p><strong>Hava ikki ráð at útihýsa</strong></p>

<p>Næstformaðurin í Siumut, Jørgen Wæver Johansen, sigur við grønlendska kringvarpið KNR, at leiðsla floksins hevur tikið Alequ Hammond til sín aftur, og hann leggur dent á, at Aleqa Hammond er ikki dømd fyri nakað. Og Siumut er ikki nakar dómstólur, sigur næstformaðurin.</p>

<p>Fólkatalið í Grønlandi er harafturat so lítið, at skjótt verður trot á dugnaligum fólkum, um fólk, sum ikki er dømd, skulu útihýsast úr politikki, sigur Jørgen Wæver Johansen.<br />
Fýra fólk eru á listanum hjá Siumut. Doris Jakobsen, sum er í fólkatinginum nú, er ikki á listanum.</p>

<p>Hon fer væntandi aftur í starvið sum landsstýriskvinna í heilsumálum og norðurlendskum samstarvi.</p>