Eystari landsrættur fellir dóm í dag

Málið er um viðskiftafólk, sum fingu lagalig sethúsalán frá bankanum, lán, sum tá avtornaði, ikki vóru so lagalig kortini.

BankNordik vann í Føroya rætti, men 20 lántakarar skutu dómin inn fyri Landsrættin, sum tók málið upp til dóms tann 19.juni. 

Viðskiftafólk stevndu BankNordik við kravi um, at avtalur um lán, sum tey tóku í 2006 og í 2007, skuldu halda fram sum upprunaliga avtalað varð, og at bankin ongan rætt hevði at broyta lánstreytirnar í 2012 og hækka rentuna.

Upprunaliga var talan um 230 húski, sum læntu okkurt um 200 milliónir kr. frá BankNordik.

Men bankin bjóðaði teimum nýggjar lánstreytir, sum nøkur tóku av. 

Onnur hildu tó fast um, at tey framvegis hava rætt til lagaligu rentuna, sum tey fingu, tá tey skrivaðu undir lánið, og stevndu BankNordik, sum tó fekk viðhald í Føroya rætti fyrst í desember í fjør.