Fiskavirkisskipanin ikki broytt áðrenn valið

Johan Dahl, landsstýrismaður í vinnumálum, ger ikki meira við tað málið. Full semja er nú í stýrinum hjá ALS um broytingarnar í fiskavirkisskipanini, so hon fer at kosta minni enn nú.

Stýrið var ikki samt um, at tey, sum arbeiða á uppsjóvarvirkjum og kryvjivirkjum, skuldu úr skipanini. Tað var annars upprunaliga ætlanin. ALS-stýrið hevur so gjørt eitt nýtt uppskot um kunngerð.

Sambært uppskotinum sleppa tey, sum eru í fiskavirkisskipanini hjá ALS, ikki at vera har so leingi sum nú. Og, sambært uppskotinum, vera færri fólk í fiskavirkisskipanini í framtíðini.

Fyrra uppskotið bíligari

Eyðfinnur Jacobsen, formaður í ALS-stýrinum, sigur, at stýrið hevur ikki roknað út, hvussu nógv ALS fer at spara, um kunngerðin kemur í gildi. Men tað verður ikki so nógv sum við fyrra uppskotinum.

SÍ EISINI Uppskot um at broyta fiskavirkisskipan

Sambært fyrra uppskotinum varð sparingin mett at vera átta til tíggju millónir krónur um árið. Johan Dahl, landsstýrismaður í vinnumálum, boðaði longu frá, tá hann fekk seinna uppskotið fyrst í juli, at hann gjørdi einki við uppskotið.

Tað skuldi bíða til eftir løgtingsvalið. Og ALS kann bíða, sigur stýrisformaðurin, tí nú eru inntøkurnar hjá ALS størri enn útreiðslurnar.