Russland víðkar handilsbann

Russiski forsetisráðharrin, Dimitry Medvedev, almannakunngjørdi boðini um handilsbannið í dag, sambært tíðindastovuni, Reuters.

Víðkaða handilsbannið kann fáa avleiðingar fyri eitt nú prísin á fiski, um íslendski fiskaútflutningurin til Russland verður umfataður av banninum.

Íslendskir myndugleikar hava enn ikki fingið greitt svar frá russum um hetta. Ísland er ikki einasta nýggja landið á russiska svartalistanum.

Fleiri onnur lond eisini á listanum

Albania, Montenegro og Liechtenstein eru sambært Reuters eisini á listanum yvir lond, sum ikki sleppa at útflyta vørur til Russlands.

Ukraina er eisini á listanum, men ukrainska handilsbannið er treytað av, at Ukraina undirskrivar eina samstarvsavalu við ES.

Russiska bannið er eitt aftursvar til londini sum setti handilstiltøk í verk móti Russlandi í sambandi við stríðið millum Russland og Ukraina.