Fáa løn hóast tey ikki verða afturvald

Løgtingsfólkini fáa mánaðarlønina í fýra, fimm ella seks mánaðir - eftir hvussu nógv ár, tey vóru í tinginum. 14 løgtingsfólk vórðu ikki afturvald tann 1. september.

Men so leingi, samgonga ikki er skipað, er hugsandi, at nøkur teirra, sum ikki blivu vald, kortini sleppa til arbeiðis aftur við Tinghúsvegin, tí tingfólk í flokki teirra fara í landsstýrið.

Ein millión sett av til vrakað tingfólk

Men 13 av teimum 14, sum ikki blivu afturvald, eru úr Fólkaflokkinum og Sambandsflokkinum, sum ikki eru við í samráðingunum um nýggja samgongu.

Enn ber ikki til at rokna út, hvussu nógv løgtingsvalið í ár fer at kosta løgtinginum í bíðiløn. Í fíggjarlógini fyri 2015 eigur løgtingið eina millión krónur til lønir til vrakað tingfólk. Um tann játtanin røkkur, ber ikki til at siga enn.

Í ringasta føri fyri pengakassan hjá løgtinginum noyðist løgtingið at rinda 47 tingfólkalønir um mánaðin tað, sum eftir er av hesum árinum. Løgtingsfólk fáa 37.000 kr. í mánaðarløn.