Stjórnarráðini broyta navn

Trý stjórnarráð í landsfyrisitingini hava broytt navn. Hetta er gjørt fyri at nøvnini skulu samsvara meira við arbeiðsuppgávurnar hjá nýggju landsstýrisfólkunum.

Í gjár lýsti løgmaður málsøkjabýtið í kunngerð. Har er greitt, at nýggja ráðið, ið higartil hevur verið nevnt Innlendismálaráðið, eitur nú Samferðslumálaráðið. Henrik Old er landsstýrismaður í samferðslumálum.

Uttanríkismál flutt av Løgmansskrivstovuni

Heilsumálaráðið broytir eisini navn. Tað eitur nú Heilsu- og innlendismálaráðið. Sirið Stenberg er sostatt landsstýriskvinna í heilsu- og innlendismálum.

Uttanríkismál eru flutt av Løgmansskrivstovuni í Vinnumálaráðið. Tískil verður nýggja heitið Uttanríkis- og vinnumálaráðið. Poul Michelsen er landsstýrismaður í uttanríkis- og vinnumálum.

Hini stjórnarráðini eru Løgmansskrivstovan, Fiskimálaráðið, Fíggjarmálaráðið, Almannamálaráðið og Mentamálaráðið.