Nú verður vinnulívsdeildin í danska bankanum seld

Tað verður Carnegi Investment Bank, sum skal standa fyri søluni av lánunum, ið danska vinnulívsdeildin hjá BankNordik hevur veitt vinnuni í Danmark.

Talan er um lán fyri tilsamans hálva aðru milliard krónur, ið eru lýst til sølu.

Í fráboðan frá BankNordik stendur, at tað hevur alstóran týdning fyri bankan, at keyparin er førur fyri at bjóða kappingarføran prís, og samstundis skal hann verða áhugaverdur partnari hjá kundunum í bankanum.

Starvsfólk fylgja við

Tann, sum keypir vinnulívsdeildina, yvirtekur eisini starvsfólkini. 

- Tað hevur stóran týdning, at vinnulívskundarnir í BankNordik kunnu varðveita sambandið við kundaráðgevan, eisini eftir søluna, sigur Árni Ellefsen, stjóri í BankNordik.

BankNordik fer í framtíðini at leggja størri dent á føroyska og grønlendska marknaðin og danska privatkundamarknaðin, stendur í fráboðanini.