Landsgrannskoðanin givið Mentamálaráðnum átalu

Mentamálaráðið fær hvassa átalu frá Landsgrannskoðanini, tí framvegis er ikki samsvar millum lógina frá 1984 um stuðul til musikkskúlar og, hvussu lógin verður fyrisitin.

Landsgrannskoðanin hevur gjørt vart við hetta síðani 2002 og ger aftur vart við sína misnøgd í ársfrágreiðingini fyri 2014.

Sóknast eftir ítøkiligum úrslitum

Eisini løgtingsgrannskoðararnir hava aftur og aftur, og seinast í februar í ár, hvassliga átalað, at einki ítøkiligt hendir viðvíkjandi Musikkskúlaskipanini.

Landsgrannskoðanin heldur, at Mentamálaráðið og skiftandi landsstýrisfólk hava skákað sær undan at loysa trupulleikarnar við at seta nevndir at kanna, gera uppskot og annað, uttan at ítøkilig úrslit eru komin burturúr.

Samanumtikið ber til at siga, at fyrisitingarligu mannagongdirnar í 30 ár hava ikki verið í tráð við allar ásetingarnar í lógini. Men hóast landsstýrisfólkini hava vitað um vantandi samsvarið, er lógin óbroytt og fyrisitingin ikki sambært lógini.

Lógin framvegis ikki broytt

Í februar 2003 vísti Landsgrannskoðanin á, at ósamsvar er millum grein eitt í lógini um, at landskassin letur studning, og grein fimm um, at landsstýrisfólkið setir lærararnar í starv.

Landskassin rindar allar lønarútreiðslurnar, og kommunurnar endurrinda landskassanum helvtina av lønunum eftir tillutaðu tímunum.

Seinast, Landsgrannskoðanin frætti úr Mentamálaráðnum, var í november í ár. Og tá var einki ítøkiligt hent. Lógin er framvegis ikki broytt.