Nú verður bíligari at brúka tunnilin

Á nýggjárinum verður bíligari at koyra ígjøgnum Norðoyatunnilin. Hvør túrur lækkar úr 50 niður í 40 kr., og mánaðargjaldið lækkar úr 700 niður í 600 kr.

Ferðslan í Norðoyatunlinum er vaksin støðugt síðani hann lat upp, og tá árið í ár er av, hava væntandi knapt 900.000 akfør koyrt í Norðoyatunlinum í ár. Tað er ein øking uppá seks prosent í mun til í fjør.

Minni í inntøku í 2016

Fyri tey sum hava árshald í báðum tunlunum verður prísurin 1.000 kr. um mánaðin. Hóast príslækkingina í Norðoyatunlinum, so kunnu haldini framvegis nýtast í báðum tunlunum.

Tá farið verður gjøgnum Norðoyatunnilin verða 40 krónur trektar, meðan 30 krónur fara av haldinum, tá koyrt verður í Vágatunlinum. Eingin broyting verður fyri akfør sum eru longri enn seks metrar.

Príslækkingin hevur við sær, at P/F Norðoyatunnilin væntandi fær 3,8 milliónir krónur minni í inntøku næsta ár.