Løgtingið viðger uppboðssøluna í dag

Landsstýrismaðurin í fiskivinnumálum biður Løgtingið um heimild at selja 10.000 tons av makreli, 5.000 tons av norðhavssild, 25.000 tons av svartkjafti og 3.000 tons av botnfiski úr Barentshavinum á uppboðssølu í 2016.

Sambært uppskotinum skulu manningarnar á skipum, sum fiska fiskin, ið verður keyptur á uppboðssølu, ikki rinda part av utreiðslunum fyri kvoturnar.

Manningin skal lønast sambært sáttmálum við føroysk manningarfeløg. Uppskotið um uppboðssølu umfatar eisini veiðigjøld á uppsjóvarfiski næsta ár.

Óvist um meiriluti er fyri uppskoti

Høgni Hoydal skjýtur upp, at veiðigjaldið á makreli verður eina krónu kilo, 20 oyru fyri svartkjaft og 75 oyru kilo fyri norðhavssild, sum eru 25 oyru meiri enn undanfarin ár.

Veiðigjald verður tó ikki lagt á tann partin av kvotuni, sum verður keyptur á uppboðssølu, og heimaflotin sleppur eins og undanfarin ár undan at rinda veiðigjald.

Í løtuni er ógreitt, um meiriluti er í Løgtinginum fyri tí partinum av uppskotinum, ið snýr seg um uppboðssøluna.

Andstøðuflokkarnir hjálpa ikki samgonguni

Kristin Michelsen, tingmaður fyri Javnaðarflokkin, hevur verið í farloyvi, men hann tekur sæti aftur í tinginum í dag.

Kristin Michelsen segði við útvarpið í gjár, at eingin avtala er gjørd við seg um selja uppsjóvarfisk og fisk úr Barentshavinum á uppboðssølu.

Løgmaður hevur eisini nevnt møguleikan fyri, at tingfólk í andstøðuni fara at atkvøða fyri uppboðssøluni, men tað skilst, at andstøðuflokkarnir ætla ikki at hjálpa samgonguni at samtykkja málið.