H71 er steypavinnari

H71 er steypavinnari í hondbólti. Teir vunnu 28-22 á Neistanum í finaluni.

Neistin var fyri tað mesta á odda í fyrra hálvleiki, men í síðsta sekundi legði H71 seg á odda 13-12.

Í seinna hálvleiki riggaði snøgt sagt einki hjá Neistanum í álopsspælinum. Teir skoraðu eitt mál fyrstu tíggju minuttirnar.

Samstundis fann H71 sítt besta spæl fram, og tá seinni hálvleikur var hálvrunnin var H71-leiðslan so stór, at alt var mest sum avgjørt.

Endin var eisini, at H71 vann við seks málum.

Tóraldur Kollsker spældi ein branndyst

Tóraldur Kollsker byrjaði ikki í málinum hjá H71, men hann kom inn og bleiv týdningarmesti leikari á liðnum.

Hann tók sera nógv skot, og hevði eitt bjarginarprosent á heili 54 prosent. Tóraldur bleiv eftir dystin valdur til dagsins mann hjá H71.

Hjá Neistanum var dagsins maður, málverjin, Nicholas Satchwell.

Neistin - H71 22-28 (12-13)

Rói Berg Hansen, Neistin, 9 mál

Pætur Thomsen, H71, 6 mál