Menninir hava tær góðu lønirnar

Stórur munur er á inntøkunum hjá monnum og kvinnum. Tað staðfestir búskaparfrágreiðingin hjá Búskaparráðnum.

Kvinnur eru meira enn helmingurin í bólkunum, ið tjena undir 300.000 krónur um árið. Í bólkunum, ið forvinna 300.000 ella meira, eru fleiri menn enn kvinnur.

Í bólkinum, ið forvinnur millum 300.000 og 400.000 um árið, eru 46 prosent kvinnur og 54 prosent menn. Tá vit koma í bólkarnar, ið forvinna meira enn 400.000, lækkar prosenttalið av kvinnum rættuliga nógv.

Av teimum, ið tjena millum 400.000 og 500.000, eru bara 28 prosent av kvinnum. Bara trý prosent av kvinnum eru í bólkinum, ið tjena eina millión og meira.