Russar koma at kanna men ikki fyrr enn í heyst

Russiski matvørumyndugleikin, Rosselkoznadzor, hevur nú boðað frá, at hann sendir fólk til Føroya í heyst, tá føroyingar fiska sild og makrel.

Annars skuldi eftirlitsvitjanin vera nú í mai ella juni.

Men nú hevur Heilsufrøðiliga starvsstovan fingið at vita, at russisku eftirlitsfólkini koma ikki fyrr enn í heyst.

Umframt at kanna uppsjóvarfiskin vilja eftirlitsfólkini síggja alilaks verða kruvdan.

Síðani 2008, tá russiski matvørumyndugleikin fyrstu ferð var í Føroyum, er føroyski útflutningurin til Russlands vaksin nógv. Hann fór upp um milliardina í 2014.

Spyrja nógv

Slíkar eftirlitsvitjanir úr Russlandi krevja nógv arbeiði á Heilsufrøðiligu starvsstovuni.

Russar hava biðið um eina rúgvu av upplýsingum um fiskivinnu og alivinnu í Føroyum, um lóggávu og eftirlit og biðið er eisini um tekningar og aðrar upplýsingar um tey 33 føroysku virkini, sum sleppa at útflyta til Russlands.  

Síðst, Rosselkhoznadzor var á eftirlitsvitjan í Føroyum, var á heysti 2013.