Málið um Gadus í rættin

Í dag verður rættarfundur í Nord-Troms tingrett í Tromsø um trolaran Gadus úr Klaksvík, sum varð tikin tann 20. februar, tá hann var á veg heim til Føroya av fiskileið í Barentshavinum.

Sambært politinum í Tromsø boðaði Gadus ikki norsku myndugleikunum frá um 140 tons, sum Gadus fiskaði millum 15. og 19. februar.

SÍ EISINI Gadus 1,1 millión krónur í bót

Skiparin fekk sektaruppskot, 25.000 norskar krónur, sum eru góðar 19.500 krónur í okkara pengum.

Harafturat vil politiið í Tromsø hava drigið inn virðið á fiskinum, sum Gadus, sambært norsku myndugleikunum, ikki boðaði frá. Talan er um knappliga 1,1 millión krónur í okkara pengum.

Boðaði ikki frá sambært reglum

Frode Stock, løgfrøðingur hjá politinum í Tromsø, segði við Útvarpið í februar, at Gadus boðaði frá 15. februar, hvussu nógv hann hevði fiskað.

Men tá hann gavst at fiska 19. februar, boðaði hann ikki frá sambært reglunum. Tí gav vaktar- og bjargingarskipið Sortland Gadusi boð um at fara til Tromsø.

Skiparin og reiðaríið noktaðu at gjalda tað, sum politiið kravdi, men bankatrygd varð veitt fyri pengunum, so Gadus kundi fara úr Tromsø.