Sjúrður spyr um uttanlandsferðir hjá drotningini

Sjúrður Skaale, fólkatingsmaður, var skjótur at lofta orðunum hjá stjóranum í Vinnuhúsinum í Degi og Viku í gjárkvøldið.

Marita Rasmussen segði, at  Margretha drotning er á ferð í øðrum londum, eru donsk vinnulívsfólk ofta við í ferðalagnum, og henda møguleika kundu føroysk vinnulívsfólk eisini hugsað sær, men tey fáa ikki brúkt hann. 

Stjórin í Vinnuhúsinum segði í sjónvarpinum, at kunningin úr Danmark er ikki nóg góð.

Spyr uttanríkisráðharran

Sjúrður Skaale hevur longu spurt uttanríkisráðharran, um hann fer at síggja til, at føroyska vinnan í góðari tíð frammanundan fær kunning um og innbjóðing til sølufremjandi uttanlandsferðirnar hjá drotningini.  

Fyri tveimum árum síðani stóð føroysku vinnuni í boði at fara til Kina saman við drotningini og donskum vinnulívsfólkum.

Men svarast skuldi í somu viku, sum innbjóðingin kom, og tí kundi eingin fara úr Føroyum, hóast áhugi var.