Býráðslimir hóttir við bót

Býráðið á Tvøroyri skulkaði sær undan at taka avgerð um tingsessin hjá Kristini Michelsen, borgarstjóra. Tað vísir innlit, Sosialurin hevur fingið í málið um dupultsessin hjá Kristin Michelsen, borgarstjóra og tinglimi. 

Býráðið vildi ikki viðgera málið, hóast aðalráðið kravdi tað. 1. september í fjør varð borgarstjórin á Tvøroyri valdur á Løgting, men býráðið tók ikki støðu til, um hann bæði kundi røkja starvið sum borgarstjóri og tinglimur.

Ryktu fleiri ferðir

Hóast Innlendismálaráðið fleiri ferðir heitti á Tvøroyrar býráð um at fáa avgreitt málið, so hendi einki í málinum, fyrr enn Innlendismálaráðið hótti við at krevja 300 krónur í dagbót frá hvørjum kommuustýrislimi frá 25. august at rokna.

Dagin fyri, at fyrstu bøturnar skuldu skrivast, kom málið um dupultmandatið hjá Kristini Michelsen loksins á skrá á býráðsfundi.

Fundurin tók avgerð um at játta eini umsókn frá Kristini Michelsen um at sleppa at røkja bæði borgarstjóra- og tingsess. Býráðsfundurin varð hildin fyri afturlatnum hurðum, skrivar Sosialurin.