Turið Arge aftur til Kyndil

Turið Arge, ið telist millum profilarnar í føroyskum hondbólti, vil sleppa aftur í grønu blusuna. Hon hevur boðað VÍF frá, at hon ikki longur er partur av felagnum í Vestmanna.

Turið Arge spældi bara ein dyst fyri VÍF, tað var ímóti Neistanum, áðrenn hon tók avgerðina.

- Eg vildi royna nakað nýtt, men tað riggaði ikki. Eg havi ásannað, at eg hoyri heima í Kyndli, sigur Turið Arge við Kringvarpið.

Í sátt og semju

Hon leggur afturat, at hon hevur havt tað gott í VÍF, og at tað er í sátt og semju við VÍF-venjaran, Geir Wardum, at hon fer úr felagnum.

Turið Arge fær karantenu, nú hon skiftir felag, og tí kann hon ikki spæla dyst fyri Kyndil fyrr enn 27. oktober. Tá spælir Kyndil ímóti Neistanum.

Kyndil er oddalið í landskappingini. Tær hava vunnið sínar fyrstu tríggjar dystir.