Somu tryggingartreytir til øll

Tryggingarfeløgini og pensjónsfeløgini í Føroyum eiga ikki at sleppa at krevja av fólki, sum eru genkannað, at tey siga felagnum frá um møgulig ættarbregði, tá tey keypa trygging ella gera avtalu um pensjón.

Løgmaður hevur sent til hoyringar uppskot um at broyta lógina um tryggingaravtalur.

Við teimum granskingum í ílegum og í genetiska arvatilfarinum hjá føroyingum, sum nú verða gjørdar í Føroyum, ber til at staðfesta, um frísk fólk hava ættarbregði til - ella arvafrøðiliga eru í serligum vanda fyri at menna ella fáa eina sjúku. 

Partur av donsku lógini setast í gildi

Slíkar upplýsingar hava áhuga hjá arbeiðsgevarum og tryggingarfeløgum. Tí verður nú mælt til at seta í gildi í Føroyum ávisa grein í donsku lógini um tryggingaravtalur. 

Sambært teirri lógargreinini kunnu feløg, sum eru undir lógini um tryggingaravtalur, ikki biðja um, fáa til vega ella taka í móti og nýta upplýsingar, sum kunnu lýsa ættarbregði og vandan fyri at menna ella fáa sjúkur.

Feløgini kunnu heldur ikki krevja kanningar, sum eru neyðugar fyri at fáa slíkar upplýsingar til vega. Hetta er galdandi bæði fyri avtalur, sum longu eru gjørdar, og nýggjar avtalur. 

Lógarbroytingin skal verja fólk

Endamálið við lógarbroytingini er at verja fólk, sum møguliga hava onkra gensjúku, móti mismuni, tá tey keypa trygging ella gera avtalu um pensjón. Tey eiga at hava sama rætt sum øll onnur í slíkum handlum.

Lógaruppskotið ger, at tryggingarfelag ella pensjónsfelag ikki kann brúka aðrar upplýsingar í sambandi við váðameting enn upplýsingar um verandi og áður verandi heilsustøðuna hjá fólki. 

Ætlanin er, at lógarbroytingin kemur í gildi 1. juni næsta ár.