Piratar royna at skipa stjórn í Íslandi

Piratflokkurin, sum nú hevur fingið litið upp í hendur at skipa stjórn í Íslandi, fer at fyrireika seg væl, áðrenn farið verður undir veruligar samráðingar við hinar flokkarnar.

Morgunblaðið skrivar, at Piratflokkurin hevur brúkt vikuskiftið til at seta seg inn í mannagongdir og fyrireika, hvussu farast skal fram.

Smári McCarthy, tingmaður, sigur við Morgunblaðið, at ongar samráðingar verða við aðrar flokkar fyrr enn í morgin, men hann sigur, at óformligt samskifti kanska verður seinni í dag.

- Vit royna at fyrireika okkum so væl sum gjørligt. Vit vilja sleppa undan at gera mistøk, sigur tingmaðurin hjá Piratflokkinum.

Trupult at skipa stjórn

Altingsval var 29. oktober, men sera striltið hevur gingið at skipa stjórn.

Eftir at bæði formaðurin í Sjálfstæðisflokkinum, Bjarni Benediktsson, og forkvinnan hjá teimum Vinstru-Grønu, Katrin Jakobsdóttir, vórðu givin við sínum royndum at skipa stjórn, segði forsetin, Guðni Jóhannesson, at nú stóð tað flokkarnar sjálvar at finna eina loysn.

Tað eydnaðist heldur ikki, og fríggjadagin heitti forsetin á Piratarnar, sum er triði størsti flokkur í altinginum, um at gera eina roynd at skipa stjórn.

Ætlanin er, at nývalda altingið skal hava sín fyrsta fund týsdagin.