Matvørulógin aftur broytast

Matvørulógin varð broytt fyrr í ár, og tann broytingin fór at virka við kunngerð fyrst í oktober. Og nú skal matvørulógin aftur broytast.

Endamálið við uppskotinum, sum Poul Michelsen, landsstýrismaður, hevur sent til hoyringar, er at liberalisera matvørulógina.

SÍ EISINI Løggildu virkini stúra

Tað verður gjørt, so til ber at selja fleiri matvørur, sum ikki er tilvirkaðar á løggildum matvøruvirki, til heilsølur, matvøruhandlar og matstovur.

Talan er bæði um seyð, neyt, flogfenað, so sum gás, dunnu og hønu, og fisk og grønmeti. Nýggja skipanin verður bara galdandi fyri tey, sum selja fyri minst eina millión krónur um árið.

Tey, ið selja fyri minst eina millión um árið, skulu tryggja sær, at vøran ikki er heilsuskaðilig ella á annan hátt óegnað sum mannaføði.

SÍ EISINI Føroyski smakkurin í vanda

Um Løgtingið samtykkir lógarbroytingina, ásetur landsstýrismaðurin í kunngerð, hvørjar neyvari treytir skulu vera umframt tær nógvu yvirskipaðu, sum eru í lógaruppskotinum.   

Landsstýrismaðurin ásannar, at fyri vinnuna, sum virkar matvørur eftir galdandi reglum um løggilda matvøruframleiðslu, kann uppskotið hava negativa fíggjarliga avleiðing, tí kappingarneytar koma á marknaðin, sum ikki skulu lúka somu krøvini um matvøruframleiðslu.