Fleiri hundrað skaðar fráboðaðir

Telefonin hevur gingið heit á Alarmsentralinum í Havn, har fólk hava tikið ímóti ringastu skaðunum, jólaódnin hevur elvt til um alt landið síðsta samdøgrið.

- Vit hava fingið umleið 350 fráboðanir um skaðar, segði Jón Klein Olsen, varapolitiinspektørur, við í samrøðu við útvarpið klokkan 10 í morgun.

Men talið skal kortini takast við fyrivarni. Løgreglan fær vanliga bara at vita um mest átrokandi skaðarnar. Tryggingarfeløgini fáa vanliga nógv fleiri fráboðanir.

Eysturoy og Norðoyggjar harðast raktar

Jólaódnin hevur elvt til skaðar um alt landið, men hetta síðsta samdøgrið eru tað serliga tvey øki í landinum, sum tykjast at vera rakt harðari enn onnur.

- Tað eru Eysturoyggin og Norðoyggjar, serliga Klaksvík, sum eru harðast raktar síðsta samdøgrið, segði Jón Klein Olsen við útvarpið fyri løtu síðani.

Annars hevur Alarmsentralurin á Politistøðini í Havn fingið fráboðanir um tekjur, húsaklædningar, garðar og bilar, sum hava fingið skaða, og skip hava slitið.