Minstaløn ásetast í øllum londunum í ES

Formaðurin í ES nevndini, Jean-Claude Juncker mælir til at øllum í ES verður tryggjað ein minstaløn fyri arbeiði, og samstundis áseta eitt minstamark fyri almannaveitingar. Tað er ein treyt fyri at samstarvið í ES skal eydnast til fulnar, sigur hann.

Og hann mælir til at tey 19 ES londini sum eru við í samstarvinum um evruna sum gjaldoyra, ganga á odda í tí tilgongdini.

Tað er ikki neyðugt at minstalønin verður tann sama í øllum londunum, men at londini geva til kennar, at tey taka undir við ætlanini.

Ein slík skipan hevði forðað fyri sonevndari sosialari dumping, uttan at skaða kappingarevnini, sigur hann.

- Eydnast ikki at gera slíkar skipanir, so er samstarvið ikki eydnast til fulnar, sigur formaðurin í ES nevndini.

ES nevndin fer í mars at leggja fram fleiri uppskot um sosial rættindi, og í fyrstu atløgu skulu uppskotini bert vera galdandi fyri londini í evrusamstarvinum. Men londini skulu sjálvi gera av, hvussu lønirnar verða ásettar.

Samstundis hava ES nevndin og Svøríki boðað til fundar í november um ætlanina.

Um okkara leiðir er ikki vanligt við at ta almenna ásetur lønirnar, tær verða ásettar í samráðingum ímillum arbeiðsgevarar og fakfeløgini.