Logan Air sleppur at flúgva uppá Føroyar

Bæði Vinnumálaráðið og danska Trafik-, Bolig- og Byggestyrelsen hava viðgjørt umsóknina frá Logan Air, og felagið hevur nú fingið loyvi at flúgva millum Vágar og Aberdeen.

Tað váttar Vinnumálaráðið í dag. Hetta gevur skotska flogfelagnum loyvi at flúgva millum Føroyar og Skotland hvønn fríggjadag og sunnudag í summarhálvuni - frá 28. mei til 31. august.

Umframt Logan Air hevur eisini SAS søkt um loyvi at flúgva millum Føroyar og Danmark, tann umsóknin er ikki liðugt viðgjørd enn.

Umsóknin hjá SAS verður væntandi liðugt avgreidd í næstum, og so verður eitt tilmæli sent til danska Trafik-, Bolig- og Byggestyrelsen at taka endaliga støðu, siga tey á Uttanríkis- og Vinnumálaráðnum.