Rakettútskjóting elvir til stúran

Norðurkorea hevur í nátt sent fýra rakettir út yvir Japanska havið í sambandi við hernaðarvenjingar. Rakettirnar eru farnar einar 1.000 kilometrar út yvir havið, siga myndugleikarnir í Norðurkorea við Reuters-tíðindastovuna.

Rakettirnar eru helst eitt aftursvar til USA og Suðurkorea, sum í farnu viku byrjaðu sínar árligu hernaðarvenjingar. Stýrið í Norðurkorea roknar hesar venjingarnar sum fyrireiking til kríggj og hevur hótt við hørðum mótátøkum afturfyri.

Greinin heldur fram niðanfyri

BREAKING: South Korea: North Korea fired several banned ballistic missiles that flew about 1,000 km into ocean off its east coast.

— The Associated Press (@AP) March 6, 2017

Japan skýrir hetta at vera eina provokatión móti altjóða trygdini, serliga tí ein av rakettunum endaði innan fyri 200 fjórðingar úr japansku strondini.

- Hetta vísir greitt, at hóttanin frá Norðurkorea er farin inn í eitt nýtt skeið, sigur forsætisráðharrin í Japan, Shinzo Abe.

USA fordømir hendingina. Hetta er brot á yvirlýsingina hjá ST-trygdarráðnum, sum forbjóðar Norðurkorea at brúka hesi sløgini av hernaðartøkni, sigur ein talsmaður fyri amerikanska uttanríkisráðið sambært AFP-tíðindastovuni.