Hótta nú við verkfalli

Kommunulæknafelagið hóttir nú við at fara í verkfall, verða arbeiðsumstøðurnar hjá kommunulæknunum í Føroyum ikki bøttar skjótt. Tað sigur Marjus Dam, formaður í Kommunulæknafelagnum, við útvarpið.

Felagið hjá kommunulæknunum í Føroyum hevur í vikuni eisini vissað sær stuðul frá læknafeløgum í norðurlondum, um arbeiðið verður lagt niður.

Tað vil siga, at norðurlendskir læknar hava lovað Kommunulæknafelagnum, at teir fara ikki í starv í Føroyum, um verkfallið gerst veruleiki. Marjus Dam vónar ikki, at tað verður neyðugt at fara í verkfall.

Trupulleikin ikki nýggjur

Marjus Dam sigur, at hetta er í fyrstu atløgu ein hóttan. Hann vil ikki siga ítøkiliga, nær tolið hjá kommunulæknunum er uppi. Men hendir einki skjótt, so eru ikki aðrir møguleikar.

Tað er trupult at fáa kommunulæknar í starv í Føroyum. Tað hevur verið støðan í nógv ár. 30 kommunulæknastørv eru í dag. 18 teirra eru mannað við kommunulæknum í føstum starvi.

Tað er bara í Havn, at tað ber til at manna leysu størvini. Uttan fyri Havnina verða flestu størvini mannað við skiftandi - ofta útlendskum - avloysarum.

Hava ov nógv at gera

Kommunufelagið heldur orsøkina vera, at kommunulæknarnir hava ov nógv at gera og at lønarviðurskiftini eru ov vánalig.

Men Marjus Dam hevur bara havt tveir fundir við landsstýriskvinnuna, síðan samgongan tók við í september 2015. Seinasti fundurin var fyri fýra vikum síðan. Og hann hevur einki hoyrt aftur.

Sirið Stenberg, landsstýriskvinna í heilsumálum, hevur sett sær fyri at nýskipa kommunulæknaøkið í hesum árinum. Felagið tekur ikki undir við teimum ætlanunum, landsstýriskvinnan hevur lagt fyri økið.