Heildarveiðan minkaði eitt vet

Føroyski fiskiflotin fiskaði 568.000 tons í fjør, tað eru 18.000 tons minni enn í 2015, upplýsir Hagstovan. 279.000 tons, næstan helvtin, vórðu fiskað í føroyskum sjógvi í fjør.

Føroyingar fiskaðu 13.000 tons meira av sild í fjør enn í 2015 og góð 21.000 tons minni av lodnu og 12.000 tons minni av makreli. Heildarveiðan er uppgjørd í livandi vekt.

Síðani 2012 er føroyska heildarveiðan vaksin góð 200.000 tons. Talan er um uppsjóvarfisk. Men hon er ikki so góð nú sum hon var metárið 2006, tá føroysk skip fiskaðu 623.000 tons.  

Fýra fimtingar av heildarveiðuni í fjør vóru uppsjóvarfiskur. 282.000 tons av svartkjafti vórðu fiskað í 2016.