Nú kann minnilutin ikki krevja fólkaatkvøðu

Tá stjórnarskipanin fór í løgtingið í 2010, varð skrivað í lógina, at ein triðingur av løgtingsfólkum kundi krevja, at ein lóg varð løgd til fólkaatkvøðu eina viku eftir, at hon var samtykt.

Lógir um fíggjarmál, lønarmál og skattamál, og lógir um útinning av galdandi millumlanda sáttmálum, kundu ikki leggjast til fólkaatkvøðu.

Tað skuldi vera ein minnilutaverja, varð skrivað í stjórnarskipanina tá.

Tá, í 2010, var hugskotið ikki nýtt.

Tí í álitinum um føroyska stjórnarskipan, sum var latin landsstýrinum tann 22. desember 1993, var ein grein 16 um minnilutaverju, har ein triðingur av løgtingslimum kundi biðja løgtingsformannin um fólkaatkvøðu um eitt lógaruppskot.

Men tað er ikki við í uppskotinum til stjórnarskipan, sum nú er farið til almenna hoyring.

Í stjórnarskipanaruppskotinum nú stendur bara, at "við lóg kann løgtingið leggja spurningar til fólkaatkvøðu."

Tað vil siga, at minnilutin kann ikki krevja eina fólkaatkvøðu.