Sjúklingahotellið: Tríggir arbeiðsbólkar setast

Tríggir bólkar skulu tryggja greitt ábyrgdarbýti, fakliga samskipan og neyðuga framdrift.

Tað sigur Heilsu- og orkumálaráðið um verkætlanina um nýtt sjúklingahotell í Keypmannahavn.

Bygnaðarskipanin er býtt millum arbeiðsbólk, verkætlanarbólk og stýrisbólk.  

Arbeiðsbólkurin hevur ábyrgd av dagliga fyrireikingararbeiðinum og tryggjar framdrift, samskifti við ráðgevarar og tilfarsframleiðslu. 

Í bólkinum eru fólk frá Sjúkrahúsverkinum, eisini frá sjúklingahotellinum, Bygningsstyrelsen og høvuðsarbeiðstakaranum.

Skulu hittast javnan

Verkætlanarbólkurin hittist javnan og virkar sum forum fyri støðulýsingar, fakliga umrøðu og samskipan. 

Har eru fólk úr arbeiðsbólkinum og fólk, sum vita nógv um fíggjarviðurskifti, løgfrøði, KT og rakstur.

Uttanhýsis fakfólk kunnu vera boðin við eftir tørvi. 

Stýrisbólkurin hevur yvirskipaðu strategisku ábyrgdina.

Í bólkinum eru deildarstjóri í Heilsu- og Orkumálaráðnum, forstjórin í Sjúkrahúsverkinum og verkætlanarleiðarin í Bygningsstyrelsen. 

Stýrisbólkurin setir karmar og kós fyri arbeiðinum og tekur avgerðir um týdningarmikil viðurskifti, so sum ressursir, fígging og tíðarætlanir.