Ikki játtaðir enn. Skulu brúkast í næsta mánað

Tað hevði ávísan skund fyrr í summar at játta fleiri pengar til skúladepilsbyggingina í Marknagili, tí pengarnir vóru uppi í september, og vandi var fyri, at byggingin steðgaði tá.

Uppskotið um at játta Landsverki 86,6 mió. kr. at leggja út, meðan gerðarrætturin millum Landsverk og Sp/f TG Verk og tryggingarfelagið AXA situr, datt burtur í farnu tingsetu.

Nú er uppskotið komið aftur í tingið.

Hóast einki tykist vera broytt viðvíkjandi september, verður uppskotið neyvan samtykt í september, skulu vanligar tíðarfreistir haldast.

Fyrsta viðgerð

Tí fyrsta viðgerð verður ikki fyrr enn 14.september. 

Og tá fer málið í Fíggjarnevndina, sum hevur upp í ein mánað at viðgera tað.

Landsverk fær ikki sínar pengar, fyrr enn lógin er samtykt í løgtinginum og lýst.

30 milliónir frá september

Í lógaruppskotinum stendur, at 30 milliónir krónur skulu brúkast frá september í ár og 56,6 milliónir í 2018.

Mentamálaráðið spurdi Landsverk, um Landsverk hevði nakað at leggja afturat uppskotinum, sum er av týdningi fyri tingsins meting um málinum. 

Tað hevði Landsverk ikki.

Gerðarrætturin verður neyvan liðugur fyrr enn í 2019.